ఇటీవల హైదరాబాద్ రోడ్డు ప్రమాద ఘటనలో ప్రాణాలు కోల్పోయిన రమ్య ఉదంతం బాగా కలచివేసింది. బంగారు భవిష్యత్ ఉన్న చిన్నారి జీవితంలో ఏదీ అనుభవించకముందే తిరిగిరాని లోకాలకు చేరుకోవడం విషాదం. ఈ ఘటనకు దారితీసిన కారణాలు నిజంగా శోచనీయం.. ఏ తల్లిదండ్రులకైనా బిడ్డలే పంచ ప్రాణాలు. వాళ్లు ఏది అడిగినా కాదనలేకపోవడం తప్పుకాదు. కానీ అది ఎలాంటి పరిణామాలకు దారితీస్తుందో ఆలోచించకుండా అన్నీ సమకూర్చడం.. అది స్టేటస్ సింబల్ గా భావించడం మాత్రం క్షమార్హం కాదు.
చదువుకునే పిల్లలకు కాలేజీకి వెళ్లడానికి, రావడానికి లేదా స్నేహితులతో బయటికి వెళ్లడానికి టూ వీలర్ చాలు. అంతకు మించి ఇవ్వగల స్థోమత ఉన్నా అది ఎలాంటి అనర్థాలకు దారితీస్తుందో చెప్పడానికి చిన్నారి రమ్య ఉదంతమే నిదర్శనం.. ఎలాంటి ప్రమేయం లేకుండా తన బాబాయి, తాత, పట్టుమని పదేళ్లు నిండని రమ్య ప్రాణాలు కోల్పోవడానికి కారణం ఎవరు? యువకులన్నాక పార్టీలు, పబ్ లు సహజమని వాదించే తల్లిదండ్రులు లేకపోలేదు. తాగమనండి.. చిందేయమనండి.. అలా తాగినప్పుడు ఇంట్లోనే ఉండమని చెప్పండి. రోడ్లమీదికి కారుల్లోనూ బైకుల మీదా వచ్చి పరుల ప్రాణాలతో చెలగాటం ఆడొద్దని చెప్పండి.. మన వినోదం, సంతోషం వేరొకరికి శాపం కావడాన్ని సమర్థిస్తారా? రమ్య కుటుంబం స్థానంలో ఉండి ఆలోచిస్తేనే వాళ్లు పడిన వేదన, అనుభవిస్తున్న క్షోభ అర్థమవుతాయి.
యువత కూడా తాత్కాలిక సంతోషం, ఆనందం కోసం దురలవాట్లకు బానిసలు కావడం, అవి ఇతరుల ప్రాణాలను బలి తీసుకునేలా ప్రవర్తించడం ఎంత వరకు సబబో ఆలోచించాలి. సిగ్నల్ పడినా ఆపకుండా వెళ్లడం, రయ్యిమని దూసుకుపోవడం మీకు థ్రిల్ కలిగిస్తుందేమో కానీ మీకేదైనా జరిగితే మీ తల్లిదండ్రులకు తీరని శోకాన్ని మిగిల్చినవారవుతారు.
చాలామంది యువకులు రోడ్డుపై ద్విచక్రవాహనాలు నడుపుతుంటేనే ఒళ్లు గగుర్పొడుస్తూ ఉంటుంది. వాళ్లు చిన్న సందున్నా చాలన్నట్లు దూసుకువెళ్తుంటే ఎక్కడ స్కిడ్ అయి పడతారో అనిపిస్తుంది. వేగంగా వెళ్లడం, ఫీట్లు చేయడం యువకులు థ్రిల్ కలిగించే అంశమే. కాదనడం లేదు. కానీ దానివల్ల రోడ్డు మీద వెళ్లే ఇతరులకు ప్రాణాపాయం కలుగుతుందనే ఆలోచన లేకపోవడం నిజంగా దారుణం. ఈ మధ్య ఒక స్కూల్ లో తల్లిదండ్రులకు నిర్వహించిన కౌన్సెలింగ్ కార్యక్రమంలో చాలా ఆసక్తికరమైన అంశాలను కౌన్సెలర్ ప్రస్తావించారు. ‘‘మా వాడు అలా కాదు.. లేదా మా అమ్మాయి అలా చేయదు’’ అనే నమ్మకం తల్లిదండ్రుల్లో చాలా సహజం. కానీ అది నూటికి 99 శాతం అపోహ మాత్రమే అని ఆమె వివరించారు. దానికి చాలా ఉదాహరణలను కూడా పేర్కొన్నారు. మగపిల్లలకు బైక్ లేదా కారు ఇస్తుంటే.. వాళ్లు ఎలా నడుపుతున్నారో పక్కనే ఉండి గమనించండి. మీరు లేనప్పుడు వాళ్ల తీరు ఎలా ఉంటుందో తెలుసుకోవడమూ పెద్ద కష్టం కాదు. అతి వేగం అన్ని వేళలా అనర్థదాయకమనే విషయాన్ని వివరించండి. అది రోడ్డు మీద వెళ్లే ఇతరులకే కాదు మీ పిల్లలకూ ప్రమాదకరమే అనేది విస్మరించకండి.
మీ పిల్లలకు బైక్ ఇస్తున్నప్పుడు వాళ్లు క్షేమంగా ఇంటికి తిరిగి రావాలని ఎంత బలంగా కోరుకుంటారో సాటి ప్రయాణికులు లేదా రోడ్డు మీద వెళ్లే పాదచారుల గురించి వాళ్ల కుటుంబ సభ్యులు కూడా అలాగే అనుకుంటారు కదా. ప్రాణం ఎవరికైనా విలువైందే. తిరిగి తెచ్చి ఇవ్వలేనిది.. వెలకట్టలేనిది.. అందుకే కాలేజీ పిల్లలకు బైక్ కొనిచ్చే ముందు అది నిజంగా వారికి అవసరమా? లేక స్నేహితులకు ఉందని అడుగుతున్నారా? మీరూ డబ్బుంది కదా అని కొనిచ్చేస్తున్నారా? బండి నడపటానికి లైసెన్స్, అనుభవం తనకి ఉన్నాయా అనేది ఒక్కసారి ఆలోచించండి.